Année pastorale 2011-2012

OUVERTURE DE L'ANNEE PASTORALE 2011 - 2012

Ouverture de l’Année pastorale 2011-2012

En ce 24 ème dimanche du temps Ordinaire, Son Excellence Monseigneur José Moko Ekanga, Evêque d’Idiofa, a ouvert la nouvelle année pastorale 2011-2012 lors de la célébration eucharistique qu’il a personnellement présidée en la Cathédrale Saint Kizito d’Idiofa. La nouvelle année pastorale, il la veut une année d’espérance chrétienne pour tous les fidèles de son diocèse. Cela apparait plus clairement dans le thème qu’il a choisi : « Un ciel nouveau et une terre nouvelle (Ap 21,1) : espérance du chrétien », thème qu’il a, dès l’ouverture de la célébration, soumis au centre diocésain de catéchèse pour exploitation et autour duquel pourra graviter la retraite sacerdotale de cette nouvelle année pastorale. Monseigneur l’Evêque a ainsi exhorté les fidèles de son diocèse à ne jamais sombrer dans le désespoir mais à toujours garder leur optimisme en vue de l’avènement d’une terre nouvelle et d’un ciel nouveau dès ici bas. Personne, a-t-il insisté, ne peut envisager la souffrance d’ici bas comme une fatalité. Tous devons savoir que nous pouvons nous en tirer par une volonté commune d’œuvrer pour le bien des uns et des autres, chacun dans la parcelle de responsabilité qui lui est assignée.

Il a en même temps, dans son homélie kikongo, insisté sur le sens du pardon, de la charité et de l’amour qui devra caractériser le chrétien. Envoyé en mission, le prêtre doit être porteur de ce message de paix et de consolation.

Et puisque cette année est également une année électorale, l’Evêque n’a pas hésité à formuler au peuple de Dieu quelques exhortations en vue d’un choix qui tienne compte du bien de toute la nation. Il faudra donc s’écarter de l’ethnicisation des élections en ne recherchant que les membres de sa propre ethnie ou de sa propre tribu. Il faut au contraire voter l’homme qu’il faut à la place qu’il faut.

Par le Secrétaire Chancelier Monseigneur a réitéré à ses fidèles l’appel des Evêques de la CENCO à la paix face aux violences en cette période préélectorale, un appel qui s’adresse à toutes les couches sociales de la RDCongo : aux acteurs politiques, aux fils et filles de ce pays, aux jeunes et aux gouvernants. Tous, nous devons tirer des leçons de notre passé récent et de la violence survenue dans certains pays d’Afrique en période électorale afin de faire preuve de retenue étant donné que l’accession à un pouvoir politique stable pour le bien du peuple congolais ne peut se faire par la violence.

Blaise AFWANISU, Secrétaire Chancelier.


MISA YA TATA PISEKOPO NA LUYANTIKU YA MVU YA BISALU YA DIBUNDU NA DIOCESE YA IDIOFA

I. NGINDU YA KUKOTILA

Bampangi batondama,

Mono ke diatisa kimenga yai ya misa sambu na kukangula mvula ya bisalu ya Dibundu na kati ya Diocèse na beto ya Idiofa. Na misa yai, mono ke zola nde beto yonso kubakisa nde beto ikele na ntoto yai bantu ya me tindama na mfumu Nzambi sambu na kulungisa kisalu ya Mwana na yandi Kristu kuyantikaka. Ikele Kristu kibeni ke tinda mosi mosi na kati na beto na kwenda kufula kisalu na yandi ya lugulusu.

Ye mono ke zola nde na mvula yai ya mvimba, nsangu ya beto fwete kuzabisa kuvanda mambu ya ke tadila kivuvu ya mukristu. Tala kikuma ya mono me zola nde ntu ya dilongi ya mvula yai ya bisalu ya Dibundu na diocèse na beto ya mvimba kubasika na ngogo yai ya ntumwa Yoani, na mukanda na yandi ya kusonga : « Zulu ya mpa yen toto ya mpa (Ap 21,1) : kivuvu ya konso mukristu ».

Na bambona meso ya yandi me kumona, Yoani ke zola kuvutula na konso mukristu kivuvu ya kusengumuna, na luzingu na yandi, zulu ya mpa ya ntoto ya mpa. Disongidila nde mukristu kulenda ve kukangama ntangu yonso na luzingu ti bikalulu na yandi ya ntama, kuyindula ntangu yonso nde mpasi ya yandi ke mona na ntoto yai ta kubikalaka kaka mutindu yina ( Ne pas envisager la souffrance d’ici bas comme une fatalité). Na konso kima ya yandi ke sala, yandi fwete kutula kivuvu ya kusengumuna luzingu ya mpa.

Yo yina, yo vanda na Diocèse na beto, yo vanda na nsi na beto Congo, beto lenda yindula ve nde mpasi ya ntangu yai ta kubikala kaka mutindu yina; beto fwete tula kivuvu ya kubasika na mampasi sambu na kukota na kiese ya kieleka ya Yoani ka mona na kidimbu ya zulu ya mpa ti ya ntoto ya mpa. Yina dilongi ya beto fwete sosa na kuzabisa na bampangi yonso ya ke bwisa kivuvu na luzingu na bo sambu na basakuba to mampasi ya bo ke mona.

Beto ta vukisa bisambu na beto kumosi na kulomba lutaninu ya kieleka ya Mfumu Nzambi na kati ya kimenga yai ya misa : lutaninu sambu na bansadi ya Nzambi ya ke tindama na kwenda kufula kisalu na yandi na bisika yonso ya bo ka kwenda, lutaninu sambu na bakristu yonso ya diocèse na beto ya mvimba.

Kansi beti yantika na kulomba ntete ndolula ya masumu na beto.


Homélie

Bampangi batondama,

Bubu yai, na kiese yonso, beto ke kangula mvula ya mpa ya bisalu ya Dibundu (ouverture de l’année pastorale). Disongidila nde mvula ya ntama imene kumana ye beto ke yantika mvula ya nkaka. Yo ikele sambu na konso muntu ntangu ya kusala bilan na kutala inki mutindu yandi me zinga mvula ya me kwenda kumana ye inki mutindu yandi ke zola kuzinga na mvula yai ya mpa.

Mutindu yina, na luyantiku ya mvula yai ya mpa ya bisalu ya Dibundu, mono ke zola ntete kupesa na beno yonso matondo mingi sambu na kikesa ti nkwamina na beno na bisalu ya Dibundu na mvula yai ya me luta. Ata mpasi me vanda, ya luzingu, ya mbongo, ya bisadilu, ya bimbefo,… luzolo ya mbote me konda ve na kulungisa ti kikesa yonso kisalu ya Nzambi na Dibundu na yandi ye mpi sambu na mameme na yandi.

Matondo mingi na Mfumu Nzambi na beto ya me zingisa beto, me santisa beto ye me tanina beto na ngolo ya Mpeve na yandi sambu na kulungisa ti kikesa kisalu na yandi.

Mvula yai ya mpa fwete vwandila beto ntangu ya kulomba diaka na bisambu ngolo ti dienga ya Mfumu Nzambi na beto, ntangu ya kubaka balukanu ya mpa, ntangu ya kulolula ti kusongisa bifu mosi mosi ya beto me sala mvula ya me luta.

Kisalu ya Nzambi na kati ya Dibundu na yandi ikele kisalu ya muntu mosi ve. Yo ikele kisalu ya Kimvuka ye ya beto yonso, konso muntu na kifulu ya yandi ikele ye na kiteso ya Mpeve ya Nzambi me fulwasa yandi ti makabu ya mutindu na mutindu.

Makabu ya Mpeve me kabila beto, beto fwete sadila yo sambu na lukumu ya Nzambi ti lugulusu ya bantu yonso. Nzambi ya ikele kupesa beto kisalu ye ke tinda beto na diya na yandi, yandi mosi ke pesa na beto bansiku ti mpila ya kulungisa mbote mbote kisalu yina . « Beno kwenda, mono ke tinda beno bonso mameme na kati ya bankoyi » (Lc 10, 3-4) ; kutita boma ve, kukwenda kunwana to kunwanisa ve. Vanda bansadi ya ngemba, bansadi ya ke longa ye ke zaba kulolula. Lolula mpangi na nge konso mbala ya yandi ke kwisa kulombila nge ndolula. Mfumu Yezu ke lomba ye ke longa na beto na kuvanda bantu ya ke lolula. Mpamba ve, mutindu ya beto ke lolula bankaka, mutindu yo yina mpi Nzambi ta lolula beto.

Na konso bwala ya beno ke kwenda ye na konso kisalu ya Dibundu ke pesa beno, songa na bantu nde “ Kimfumu ya Nzambi me kuma na kati na beno” (Lc 10, 1.28). Beno vanda batemwe ya Kimfumu yina na kulonga ngemba, lutondo, masonga, bumosi. Luzingu ti bisalu na kati ya Dibundu fwete vanda ya lutondo, ya ngemba ti ya masonga.

Na beno bampangi bakristu, beno fwete lemfukila ye kuzitisa bansadi ya Nzambi ke tinda na kati na beno. Yunsa na kusadisa bo na bandongisila ya kieleka ye na kusimbisa bo na dikabu ya kufwana. Beno vila ve nde beno bantu ya ntete ya fwete kusimbisa ye kusadisa bansadi ya Nzambi. Mono ke zodila nde na mvula yai, beno kudipesa ya kieleka na bisalu ya kusimbisa Dibundu (Prise en charge).

Mono ke zola mpi nde mvula yai kuvandila beto mvula ya bisambu, ya ndolula, ya lutondo ti ya masonga sambu na kuyadisa Kimfumu ya Nzambi na kati ya ntoto na beto ye ntete ntete na kati ya diocese na beto.

Beno simba nde kisalu ya ntete ya Dibundu ikele kulonga Nsangu ya Mbote, Nsangu ya lugulusu sambu na kuyadisa ngemba na ntoto mvimba. Mfumu Yezu me sila na kupesa ye na kubikisila beto ngemba na yandi na mpila nde kisalu na yandi kudiatama bonso kufwana. Ngemba yina ikele ve bonso yina ya ntoto yai ke pesaka. Sambu ngemba ya kieleka ya Nzambi, yo ke basikaka na bitumba ve, na bimbeni ve, na kunwanina bimfumu ve. Ngemba ya kieleka ke basika na lutondo ti na masonga. Kana konso muntu kutonda kisalu na yandi ye kana konso muntu kutonda mpi nkweno na yandi na masonga yonso, ngemba ta kota na bantima na beto ye na ntoto na beto. Beno kuzaba nde kana ngemba ikele ve, kisalu ya mbote lenda kusalama mpi ve. Ngemba yina, beto fwete sosa yo ye kuyedisa yo na bifulu ti bimvuka na beto ya luzingu ti ya bisalu: na baparoisse na beto, na mabwala na beto, na banzo-nkanda na beto, na bafamilia na beto. Mbala mingi, lutondo ke konda beto, masonga ke konda beto, yo yina ntoto ke beba, bisalu ke beba.

Bonso beno ikele kuzaba, mingi na kati na beno ikele bantwadisi ya banzo-nkanda, bibuti ya bafamilia, bantwadisi ya baparoisse. Mono ke lomba na beno yonso na kuvanda bangungudi ya mbote ya ikele kunata mameme ya Mfumu Nzambi me pesa beno na nzila ya masonga ti ya ngemba: masonga na bisalu na beno, masonga na luzingu na beno.

Sambu na Banganga-Nzambi, beno longa yina ya beno ke kwikila ye beno zinga yina ya beno ke longa. Na mukanda ya beto bapisekopo ya Congo kusonikilaka beno (Exhortation pastorale des Evêques de la Conférence Episcopale Nationale du Congo aux prêtres de l’Eglise-famille de Dieu), beto kuvilaka ve na kupesa na beno matondo na kisalu ya mbote ya beno ke sala na kati ya bakristu; na kumona inki mutindu, na kati ya bambangika ya ntoto yai, na kati ya mampasi ya mutindu na mutindu, beno ke yunsa na kusonga kitemoin ya kieleka na Kristu ye na kusimbisa lukwikilu ya bampangi bakristu; inki mutindu na kati ya bunsukami yonso, nkatu bisadilu ya kieleka, beno ke fula kisalu na beno na kiese yonso. Yonso yina ke songa mutindu beno me ndima na kukangama ngolo na Kristu ya imene kundima mpasi ya ntoto yai sambu na kugulusa ntoto mvimba. Kansi beno ke vila ve inki mpasi me vanda na beto na kumona mpi mutindu bamingi na kati na beno ke diatama mbote mbote ve bonso Dibundu ikele kulomba. Ya mono ke pesa na beno kikesa, mono ke lomba na beno mpi na kusosa kukwelisa bikalulu na beno na Ndinga ya Nzambi. Beno sosa na kukituka basantu ye na kusantisa kanda ya bana ya Nzambi na mbandu ya luzingu na beno.

Bampangi batondama, bonso beto ke zaba, mvula yai ta vanda mpi mvula ya beto ata kupona bantwadisi ya nsi na beto. Mono ke zodila na beno na kusala yo na kimukristu yonso, disongidila na lutondo yonso, na masonga yonso, nkatu kutala ndinga, bwala, kikanda. Beto kusosa na kutala ntete mambote ya nsi na beto. Beno simba nde kuvanda mpangi disongidila ve nde kuvanda ntwadisi ya kieleka. Beto Bapisekopo ya Congo, beto me longa beno mambu yai bonso kufwana na nkanda ya beto me sonikila beno na yina ya ikele kutadila Dibundu ya Katolika ti mponama ( L’Eglise Catholique en RDCongo et les élections. Répères et défis pastoraux). Beno pona na masonga yonso bantu ya kulunga na bifulu ya kulunga.

Bampangi batondama, mono ke zola na beno kubakisa mpi nde konso mukristu ikele na kisalu ya Nzambi me pesaka yandi. Yunsa na kuvanda ntete ngungudi na nge mosi na kutomisa luzingu ti kisalu na nge na ntwala nge kuvanda ngungudi ya mbote sambu na bankaka. Bika nde bumosi kuyala beto, nzala ya kusadila bankaka kuvanda na beto, nzala ya masonga kuyala beto.

Na mavwanga ya ntoto yai, na luvunu ya ntoto yai, Nganga Nzambi, mukristu kuvanda mwinda, yandi kuvanda mungwa sambu na kutemuna ye sambu na kupesa ntomo. Kana nge Nganga Nzambi, nge mukristu kuvidisa ntomo na nge, nge ta vanda diaka mfunu ve (Cfr Mt 5,13-14). Na nge kuvidisa ve ntomo na nge, vanda ntangu yonso ti Kristu; vanda ntangu yonso na lukwikilu na Kristu; vanda ntangu yonso muntu ya bisambu.

Na luyantiku ya mvula yai yampa, mono Pisekopo na beno ke dodokila bisambu ya Mama Santa Maria, mama ya Nzambi ye mama na beto, na yandi kusimbisa diocese na beto ye kutanina nsi na beto Congo. Yandi kutula na ntima ya konso muntu nzala ya ngemba, ya masonga ye lutondo ya kieleka.

Mono ke pesa na beno lusambulu na mono na zina ya Tata ti ya Mwana ti ya Mpeve santu

Idiofa, le 11 Septembre 2011

+ José MOKO EKANGA

Pisekopo ya Idiofa

Diocèse d'Idiofa3721, Avenue St.ChristopheB.P.8251 Kinshasa I,  Rep.Dém.du Congo